ក្រុមហ៊ុន Apple បានប្រកាសចេញលក់ iPhone 6 និង iPhone 6Plus នៅលើទីផ្សារចំនួន ២២បន្ថែមទៀត កាលពីសប្ដាហ៍មុន ប៉ុន្តែក្នុងចំណោមទីផ្សារទាំង ២២នោះ ពុំមានចិនឡើយ ដែលជាហេតុធ្វើឲ្យអតិថិជន Apple នៅក្នុងប្រទេសចិនអន្ទះសារ និងឆ្ងល់ពីបញ្ហានេះ ។
ដោយឡែកនៅពេលនេះ សារព័ត៌មាន Bloomberg និង Apple Insider បានចុះផ្សាយដោយដកស្រង់ នូវប្រភពព័ត៌មានច្បាស់ការ មួយពីប្រទេសចិនថា ក្រុមហ៊ុន Apple នឹងចេញលក់ iPhone អេក្រង់ធំទាំងពីរម៉ូដែល នៅក្នុងប្រទេសចិន នៅថ្ងៃទី១០ខែតុលាឆ្នាំ ២០១៤ ខាងមុខ ។
ប្រភពដដែលបានបន្តទៀតថា ក្រុមហ៊ុន Apple នឹងចាប់ផ្ដើម បង្រៀនបុគ្គលិកបម្រើការងារ នៅក្នុងហាងរបស់ខ្លួន នៅថ្ងៃទី០៧ខែតុលា ពោលគឺមុនពេលចេញលក់ ៣ថ្ងៃ ។ សម្រាប់តម្លៃនោះ ត្រូវបានគេដឹងថា iPhone 6 នឹងមានតម្លៃ ៨៦៣ដុល្លារអាមេរិក ខណៈដែល iPhone 6Plus មានតម្លៃ ១០២៦ដុល្លារអាមេរិក ។
គួរបញ្ជាក់ផងដែរថា បច្ចុប្បន្ន iPhone 6 និង iPhone 6Plus បានចេញលក់ជាផ្លូវការ នៅលើទីផ្សារចំនួន ៣១ នៅទូទាំងសកលលោក ៕
