ក្លឹបយក្ស Real Madrid កំពុងលួងលោមខ្សែបម្រើ Gareth Bale ឲ្យបន្តកុងត្រាថ្មីទៀត ដោយគ្រោងឲ្យថ្លៃឈ្នួលកីឡាកររូបនេះខ្ពស់បំផុត ក្លាយជាតារា “លេខ១” ប្រចាំក្លឹប លើ Cristiano Ronaldo ទៀត។ នេះបើតាមកាសែតអង់គ្លេស The Sun បានចុះផ្សាយ។
បច្ចុប្បន្ន Ronaldo គឺជាកីឡាករដែលមានថ្លៃឈ្នួលខ្ពស់ដាច់គេនៅក្រុម Real Madrid និងជាកីឡាករម្នាក់ ក្នុងចំណោមកីឡាករដែលមានថ្លៃឈ្នួលច្រើនបំផុតលើលោកផងដែរ។ ប៉ុន្តែបើតាមសេចក្ដីរាយការណ៍ចុងក្រោយ ក្លឹបស្ដេចស គ្រោងនឹងឲ្យថ្លៃឈ្នួល Bale លើ CR7 វិញ ដោយចង់ឲ្យបន្ថែមកិច្ចសន្យា២ឆ្នាំទៀត។
តារាឆ្នើមជម្រើសជាតិវែល Bale នៅជាប់កិច្ចសន្យាចាស់ជាមួយ Real ដល់ឆ្នាំ២០១៩ ប៉ុន្តែកន្លងមកមានក្លឹបមួយចំនួនដូចជា Bayern Munich និង Paris Saint-Germain ចង់បានខ្សែបម្រើស្លាបរូបនេះ ទើបក្លឹប Real បារម្ភចង់បន្ថែមកិច្ចសន្យា២ឆ្នាំទៀត ដល់ឆ្នាំ២០២១ តែម្ដង។
Bale បានបំបែកកំណត់ត្រារបស់ Gary Lineker អតីតខ្សែប្រយុទ្ធក្រុម FC Barcelona កាលពីយប់ថ្ងៃអាទិត្យ ដោយក្លាយជាកីឡាករចក្រភពអង់គ្លេស ដែលស៊ុតបានច្រើនជាងគេនៅ La Liga។ អតីតកីឡាករក្រុម Tottenham Hotspur រូបនេះ ស៊ុតបាន៤៣គ្រាប់ ក្នុងការបង្ហាញខ្លួនឲ្យ Real ៧៦ប្រកួតក្នុងលីគ៕
ប្រភព៖ សប្បាយ